“Te mach’atic ma’ba sch’uhunic soc te ma’ba smahliybelic yu’un ay bin xhu’ spabel ha’i bats’il swinquilel lum ini ya to xcham yo’tanic yu’un ah c’alal ya yilic bin xc’oht ta pasel, ta scaj te ay bin ay yu’un te bats’il swinquilel lum ini ha’ te la ayix bin yach’il la stahic ta ilel, ay swayichic soc ay sbehlaltesel scuxlejalic ta stahel c’ohel slecubel slumalic”

 Nigtipipi Ailigandi, mujer indígena kuna

 Ta stojol jbanquil jwix quihts’inabex ta jlumaltic México

Ta stojol yoxlajunebal municipio te ban c’alal tey ay ah soc te MODEVITE

Ta stojol spisil spucojibal c’opetic

Ta stojol spisil mach’atic noc’ol yilbelic bahel stahel slamalil qu’inal.

Ta slehel yochelinel sbah bats’il swinquilel lum ta jlumaltic Chiapas, ta cocheltic to ya jc’antic jsuhtic te bin la jalti’taybotic c’alal noc’ol sc’ambel ya’telic ah, ta yip co’tantantic to but’il me’bah obol noc’ol jlehbeltic slecubel jcuxlejaltic, ma’ba ya jquejchantic ta slehel slecubel jcuxlejaltic yo’tic soc li’bahele.

C’alal ta sjahchibal to te syomel sbah swinquilel lum la cac’cotic ta na’el te ma’ jc’ancotic te jwohc’ jleh j’u’lelatic soc te noc’ol spitbel comonaletic; ya xyombehenoncotic ta scoltayel sc’oblal te ca’telpatantayel jbahtic but’il yach’il beh soc te bin ut’il ya jtehc’an j’a’teletic cu’untic ta stalel jc’ahyineltic, ya jcoltaycotic te c’anojel yu’un municipio Chilín soc Sitala’ ta stojol te j’a’tejpatan ta IEPC yu’un yacuc x’ich’botic ta muc’ te yochelic ta stuquel o’tantayel sbahic. Spisil me ine ha’ jun yach’il beh te ma’ba ta jwohc’ jleh j’u’elal.

Te stehc’anel j’a’tejpatanetic ha’nix hich la spasic but’il c’ahyemic nanix ah ta jwohc’ jleh j’u’elal, ha’ yu’un cocheltic soc ha’ te bin noc’ol jlehbeltic ya caltic ta jamal MA’BA LI’ XLAJ CO’TANTIC TA SBEHENTESEL STAEL SLECUBEL SCUXLEJAL JLUMALTIC.

Te sloqu’esel ta jmunicipiotic te jwohc’ jleh j’u’elaletic bayel a’tel yich’oj soc bayel c’ahc’al, te bin ut’il ya yuts’in te me’ba o’bol soc ay ya yaqu’ic jun smuc’ul o’tanil ha’ yu’un te comonaletic c’ax c’un ta lo’loyel. Haxan teme scuyic tey xch’ay ta co’tantic ah te bin ma’ ya’beyohotique, ma’ba hichuc.

Bin wan ut’il xch’ay ta co’tantic te uts taqu’inlaj yac’ jbetintic ta sc’oblal slecubel jbaqu’etaltic, slecubtesel behbehtic, sch’ayel ta o’tanil schaplejal snopel hun? ¿Bin wan ut’il xch’ay ta co’tantic te bayel sloqu’esbelic taqu’in ah te sc’uhlejal jlum jqu’inaltic? Teme snopbelic yu’un ta sbahebeyal sc’ahc’alel julio tey laj co’tantic ah, c’ax jowiyemic.

Te schahpanel slehel slamalil qu’inal ta jlumaltic ha’ te coqueltic ban c’alal ayotic ta jyomel jbahtic, ya sc’an yomol x’atehotic bahel, ta sna’ulanel bin noc’ol jc’ambeltic ta jujutuhl soc bin sc’ambel te jcomonaltic. Ha’ yu’un c’alal c’ax te stsahel j’a’tejpatan ta sbahbeyal sc’ahc’alel julio la stsob jbahtic ban c’alal ayotic ta MODEVITE ta squ’intayel te jwayichtic ta stahel c’ohel te “ca’telpatantayel jbahtic” soc la cac’tic ta ilel te ya jc’an jpastic ha’i a’tel ma’ba ta jwohc’ jleh j’u’elal ya jpastic.

Hich but’il jna’tiquix mach’a hilem ta j’a’tejpatanil ta municipio soc ta jlumaltic Chiapas, ha’ ca’teltic stenel yu’un yacuc spas ta lec ya’telic ma’ teyuc slah wocolil ah c’alal och yach’il j’a’tejpatan ta jmunicipiotic. Quipintestic xan te syomel jbahtic, jbanquil jwix quihts’inabex, ha’nax teme yomolotic xhu’ jpasbeltic soc jcombeltic yip te schaplejal j’u’eletic.

Ca’beytic xan yich’ yip te syomel jbahtic, sc’ahc’alel sjamel jsitic te bin ya slo’loyotic te j’u’eletic but’il coltayel noc’ol ya’belotic soc te bin la yalti’taybotic te j’a’tejpatanetic, ho’otic ay quiptic soc stulanil co’tantic ta slehel lec jcuxlejaltic yo’tic soc talel yac cal jnich’antic.

But’il MODEVITEhoncotic ma’ba la jchon jbahcotic ta jwohc’ jleh j’u’elaletic yu’un te jwayichcotic ma’ba ay ta yawil stsahel j’a’tejpatan.

¡POR LA VIDA POR LA PAZ PARTIDOS POLÍTICOS NUNCA MÁS!

MODEVITE en sus 13 frentes:

Salto de Agua,  Palenque, Yajalón, Sitalá, Chilón, Altamirano, Ocosingo, Oxchuc, Tenejapa, Cancúc, Huixtán, Chicomuselo y Ejido Candelaria de SCLC.